श्री गोमटेश स्तोत्रं

विसट्ट कंदोट्ट दलाणुयारं, सुलोयणं चंद समाण तुण्डं

घोणाजियं चम्पय पुप्फसोहं, तं गोम्मटेसं पणमामि णिच्चं ॥१॥

 

अच्छाय-सच्छं जलकंत गंडं, आबाहु दोलंत सुकण्ण पासं

गइंद-सुण्डुज्जल बाहुदण्डं, तं गोम्मटेसं पणमामि णिच्चं ॥२॥

 

सुकण्ठ-सोहा जियदिव्व संखं, हिमालयुद्दाम विसाल कंधं

सुपेक्ख णिज्जायल सुट्ठुमज्झं, तं गोम्मटेसं पणमामि णिच्चं ॥३॥

 

विज्झाय लग्गे पविभासमाणं, सिहामणि सव्व-सुचेदियाणं

तिलोय-संतोसय-पुण्णचंदं, तं गोम्मटेसं पणमामि णिच्चं ॥४॥

 

लया-समक्कंत-महासरीरं, भव्वावलीलद्ध सुकप्परुक्खं

देविंदविंदच्चिय पायपोम्मं, तं गोम्मटेसं पणमामि णिच्चं ॥५॥

 

दियंबरो जो ण च भीइ जुत्तो, ण चांबरे सत्तमणो विसुद्धो

सप्पादि जंतुप्फुसदो ण कंपो, तं गोम्मटेसं पणमामि णिच्चं ॥६॥

 

आसां ण जो पोक्खदि सच्छदिट्ठी, सोक्खे ण वंछा हयदोसमूलं

विराय भावं भरहे विसल्लं, तं गोम्मटेसं पणमामि णिच्चं ॥७॥

 

उपाहि मुत्तं धण-धाम-वज्जियं, सुसम्मजुत्तं मय-मोह-हारयं

वस्सेय पज्जंतमुववास-जुत्तं, तं गोम्मटेसं पणमामि णिच्चं ॥८॥